क्वारेन्टिनमै भयो बिहे, वडाध्यक्ष बने पुरोहित :

क्वारेन्टिनमै बिहे, वडाध्यक्ष बने पुरोहित : 
मधेश दर्पण, 
अषाढ ०२ , 
क्वारेन्टिन बसाइलाई कतिपयले परिवारका सदस्यहरुसँग छुट्टिएर बस्नुपर्ने बाध्यात्मक परिस्थितिको रुपमा लिएका छन् । तर त्यही क्वारेन्टिनलाई कसैले वैवाहिक सम्बन्ध सुरुवात गर्ने अवसरको रुपमा पनि उपयोग गरेका छन् । यस्तै भएको छ दाङमा । दाङको घोराही उपमहानगरपालिका १८ स्थित बेलघारी क्वारेन्टिनमा एक जोडीले प्रेम सम्बन्धलाई वैवाहिक जीवनमा परिणत गरेका हुन् । घोराही १८ नवलपुरका २३ वर्षीय कृष्ण वली र घोराही उपमहानगरपालिका ५ जवरपुरकी २१ वर्षीया सीता चौधरीले वर पीपललाई साक्षी राखी बिहे गरेका हुन् । वडाअध्यक्ष भरतमणि अर्यालले वैदिक मन्त्रोच्चारण गरे भने बेहुलाले बेहुलीको खाली सिउँदो भरे । अनि बिहे सम्पन्न भयो । वडाअध्यक्ष अर्यालले भने, ‘परिवारका सबै सदस्य भेला हुने स्थिति पनि भएन, मन्दिरसम्म पुगेर बिहे गर्ने अवस्था पनि रहेन । त्यही भएर वरपीपललाई साक्षी राखेर भौतिक दुरी कायम राखेर क्वारेन्टिनमै बिहे गराइदिएँ ।’ बिहेमा केटी पक्षका कोही नरहे पनि केटा पक्षका परिवारका सदस्य भने सहभागी थिए ।